Aftenposten tek måndag endå ein gong på leiarplass opp den vanskelege situasjonen i politiet. Avisa ser no heilt klart "en mektig fagorganisasjon som nekter å følge arbeidslivets spilleregler".

Politiets Fellesforbund får for tida mange meldingar frå medlemmar som er lei av å verta skulda for ikkje å gjera jobben og "følge spillereglene". Eit medlem har skildra det slik:  "Vi polititjenestemenn har i mange år påpekt behovet for økte ressurser til etaten. Politikerne har neglisjert dette. Vi har dekket over problemene ved å jobbe overtid all mass og byttet vakter og brutt arbeidstidsbestemmelsene, kjørt i falleferdige biler og klunket på gamle PC'er." Han skriv vidare: "Nå ønsker vi ikke lenger "dekke" over politikernes manglende tilføring av ressurser til etaten, ved å jobbe overtid og bryte arbeidstidsbestemmelsene. Nå ville vi holde oss til reglene og ta vare på fritiden. Jeg vil kalle det en "kollektiv plystring" – synliggjøring av ressursmangelen – ikke primært en lønnskamp."

Det er det same lensmannen i Sykkylven, Evelyn Liset, er inne på når ho uttalar til Aftenposten laurdag 4. juli: "Mannskapsmangelen er nok en større årsak til slitasjen enn det denne konflikten er".

Politiet er ei yrkesgruppe som har eit sjukefråvær som er 2% lågare enn snittet i staten. Samstunds er politiet  den yrkesgruppa i staten som jobbar mest overtid. Nye tal frå Statens sentrale tenestemannsregister synar at politifolk som er omfatta av arbeidstidsbestemmelsane, jobbar 12,3 prosent overtid. Tilsvarande tal for andre statstilsette er 3 prosent. Dette er eit prov på at politiet ikkje driv overtidsnekt, som media skuldar oss for.

Men arbeidsmiljøloven § 10 slår fast at arbeidstakarar har rett til å verta friteken for overtid under gitte føresetnader. Den retten har også politifolk. Overtid som fell utanfor denne fritaksretten, jobbar sjølvsagt politifolk framleis. At den enkelte polititenestemann og kvinne vel å beskytte sin fritid utover den pålagte overtida, er jo deira frie val og rett.

Til og med politifolk har familie og vener å ta seg av. Det er mange unge politifolk som sluttar i etaten, for arbeidstidsordningar og overtidsbruken er ikkje foreinleg med familieliv og små barn.

Me har også tatt ansvar for å løysa situasjonen. I samtalane om nye arbeidstidsbestemmelsar i politiet sist veke hadde politidirektøren og justisministaren ein sjanse til å få ein meir fleksibel arbeidstidsavtale, 230 årsverk meir politikraft og ein godt motivert arbeidsstyrke. Den anledningen nytta dei ikkje. Me beklagar på vegne av publikum og medlemmane.

Arne Johannessen
Forbundsleiar