Tid for optimisme

Landsmøtet til PF var eit samlande landsmøte. Det gav ny energi til organisasjonen, med gode debattar og gode vedtak. Mange vart nok overraska over vedtaket angåande væpning av politiet. Det har kun vore eit tidsspørsmål når PF kom til å landa på det

vedtaket. No var tida inne. Dette vedtaket har heldigvis ført til at mange har engasjert seg i debatten, både i og utafor etaten.

Landsmøtet valte eit forbundsstyre med mange nye. Eg takkar for tillit nok ein gong. Det er ei stor ære å verta valt samrøystes med ståande applaus, særleg når det er siste gong eg stiller som kandidat.

Politiet har fått ny Politidirektør. PF gratulerer Odd Reidar Humlegård og er svært glade for at me har fått ein Politidirektør med politiutdanning og brei leiarerfaring frå politiet.

Justisministar Faremo signaliserte på PFs landsmøte at ho ville starta eit politistudie. Det er 6 år sidan PF fatta vedtak om dette, så det vart godt motteke på landsmøtet. Studiet skal vera ferdig til sommaren 2013. PF har fått invitasjon til dialog med arbeidsgruppa, og vil sjølvsagt nytta dette høve godt til å jobba med framtidsbildet for Norsk politi.

Stortingsmeldinga ang oppfylging av 22. juli-kommisjonen kjem i februar/mars. Det er signalisert ein tilleggsproposisjon der det kjem økonomi som oppfylging av denne Stortingsmeldinga. Det er eit positivt signal.

Meirverdiprogrammet er godt i gang. Regjeringa har valt det beste alternativet med ein prislapp på 2,8 milliardar. Dette vil bety svært mykje for arbeidsprosessar, effektivitet og publikumsservice.

Endringsprogrammet i regi av POD er starta opp. Det er skissert opp gode ambisjonar på kort og lang sikt. Ein vil få avklaringar på viktige operative tiltak som førehandslagring av våpen i alle bilar, også for dei som har reserveteneste og i UP sine bilar. Fokus på operativ trening, erfaringslæring, leiarrolla, medarbeidarskap og kulturen i politiet.

Ein byrjar å sjå effekten av dei store opptaka på Politihøgskulen. 2013 er det første året med 720 nyutdanna, og dette vil halda fram i mange år. No vil bemanninga per 1000 innbyggjarar gå rett veg, sjølv om det er langt opp til to per 1000.

Ja, det er grunn til optimisme, og den optimismen må no leiarane og tillitsvalte spreia inn i etaten. Men det er også mange risikofaktorar som kan verka negativt inn på denne utviklinga. Den største utfordringa er dei pågåande ATB-forhandlingane. Arbeidsgjevar og politisk leiing må syna at dei tilsette som skal stå for endring og utvikling også vert satsa på.

Arbeidsgjevar forventar endå større unntak frå arbeidsmiljølova, då forventar PF at alle forstår at det kostar pengar. Dersom ein skulle enda med ein konfliktsituasjon rundt ATB, ville det vera katastrofalt inn i dei positive endringane som skal skje.

Det er også ein utfordring at mange leiarar og andre tilsette har mista trua på positive endringar. Ein har opplevd utgreiingar på utgreiingar, analysar i bøtter og spann – utan at det har ført til meir politisk handling. Dei tilsette er utålmodige.

POD og endringsprogrammet må raskt synleggjera konkrete og positive endringar. Dette er avgjerande for å få positiviteten ut i etaten.

Det ligg sjølvsagt også potensiale til konfliktar og uro ang organisatoriske endringar, samanslåing av politidistrikt, sentralisering av driftseiningar, og ikkje minst dersom ein vil fjerna ulike arbeidsoppgåver frå etaten.

Den tida politiet står framfor er utruleg spennande. Moglegheitene for positiv endring har aldri vore større. Denne sjansen vil det truleg gå mange år før ein får igjen. Det er eit leiaransvar å nytta denne anledninga, då må ein også trekka med seg PF-tillitsvalte på alle nivå.

2013 vil legga grunnlaget for kva politi Noreg skal ha dei neste 10-15 åra. Me er heldige som får vera med på dette arbeidet. PF er klar for å delta positivt, men då er det viktig at arbeidsgjevar tek ansvaret for å få ein god ATB-avtale som skapar positivitet og motivasjon hos dei viktigaste aktørane i endringsarbeidet – dei tilsette som skal skapa betre beredskap og ofra endå meir for eit tryggare samfunn.


Arne Johannessen
Forbundsleiar

Flere blogginnlegg: